تسبب ألبوم الفنان عمرو دياب الجديد "ابتدينا" في اشتعال الحرب على مواقع التواصل الاجتماعي خلال الساعات الماضية بين الكاتب والسيناريست محمد صلاح العزب والشاعر والسيناريست أيمن بهجت قمر، وذلك في تصعيد مباشر بعد خلاف بين الطرفين بدأ بانتقاد العزب لكلمات بعض أغاني ألبوم الهضبة، ورد عليه قمر بأسلوب أثار استياء العزب، ليقرر الأخير الرد بمنشور مطوّل احتوى على هجوم حاد وسخرية لاذعة.

كانت بداية الأزمة، عندما نشر العزب تدوينة عبر حسابه الرسمي على "فيسبوك"، انتقد خلالها كلمات بعض أغاني عمرو دياب، دون ذكر أسماء، وكتب ساخرًا: "سيبك من الألحان والتوزيع والمزيكا والطبل والزمر والهيصة وعمرو دياب وتريند وفرحة الصيف وأنا مهما كبرت صغير... ادخل على اليوتيوب، واقرأ الكلام اللي مكتوب تحت كل أغنية، كده راجل لراجل، من غير دوشة أو غلوشة".

وأضاف: "المفروض إن الكلام ده هو زبدة الزبد، وعصارة آلاف السنين من الشعر العربي والغنائي، وتجارب الحب والخذلان والفرح واللوعة... لكن لما تيجي تبص، مش هتلاقي لا صورة، ولا إحساس، ولا حتى جملة واحدة تعلق".

وجاء الرد سريعًا من أيمن بهجت قمر عبر تعليق قال فيه: "إحنا كمان بنشوف مسلسلات مملة وبتتذاع وبتتنسي، وبنسكت وبنحترم زمايلنا رغم اختلاف أعمالهم، فأقترح تراجع شغلك قبل ما تنظّر على ناس بتتعب وبتقدّم أعمال محترمة".

فعاد العزب للرد على قمر عبر "فيسبوك" بتوضيح قال فيه: "فيما يتعلق بموضوع كلمات ألبوم عمرو دياب، عشان في مواقع كتير ناشرة كلام محصلش، أنا راجل مسالم لا بحب الخناق ولا وجع القلب، وده آخر كلام هقوله في الموضوع ده ما لم يجد جديد".

أضاف: "كتبت على صفحتي الخاصة اللي مشتريها بفلوسي وبدفع النت بتاعها على حسابي، رأيي المتعلق بذوقي، اللي هو بتاعي ويخصني، إني مش عاجبني بعض كلمات أغاني ألبوم عمرو دياب. ما أنا حر يا عم، لا جبت سيرة حد بالاسم، ولا قلت كل الأغاني، مع إنه برضه عادي".

واصل العزب: "الزميل اللي ليه كل احترام وتقدير، الأستاذ أيمن بهجت قمر، البطحة وجعته تقريبًا، فاتنحرر، رغم أنه مجرد شاعر من وسط 10 شعراء كبار مثلًا في الألبوم، ودخل يقولي ما إحنا بنتفرج على مسلسلات سطحية ومبنتكلمش! اللي هو أنت برضه لما تلاقي زمايلك عاملين حاجات سطحية متتكلمش؟".

وأكد: "أنا يا سيدي مبتضايقش لما حد بينتقد شغلي، وعمري ما رديت على حد قال شغلك حلو ولا وحش، وياما اتقال حلو واتقال وحش، ودي طبيعة الشغلانة".

ثم كشف مفارقة في موقف قمر قائلاً: "كمان صحيح، المسلسلات بتاعتي اللي مش عاجبة الأستاذ، هو اللي كاتب لها أغاني التترات أساسًا، بس هو اكتشف إنها كخة دلوقتي! عشان التترات دي نحتاية ع السريع كده، مش لازم يعرف المسلسل ده حلو ولا وحش قبل ما يقرر يشارك فيه... المهم الشيك".

تابع: "وأكيد يا عم أيمن، واحد زيك عنده توليفة فاخرة من الأعمال الساذجة، من أول مسلسليكو، وليالي الحلمية 6 اللي أكيد معذب أسامة أنور عكاشة في تربته، وقنبلة الضحك عنتر ابن ابن شداد، لحد فلانتينو، وأهل الكهف، والهنا اللي أنا فيه، وغيره وغيره! ده شغله ودي دماغه، ما يسكت، وما يتكلمش عن العمق خالص... مش لايق يعني".

وكشف العزب عن خلافات شخصية بينه وبين بهجت قمر، قائلًا: "الأستاذ المبجل ده كان عندي على فيسبوك ضمن الأصدقاء، ومسحته من سنة ونص ولا حاجة عشان نفس الفكرة والشخصية المهزوزة، وإنه قموصة، كل ما حد ينتقد شغله من الجمهور يقعد يتخانق معاه. والواحد ماعندوش مرارة زيادة يقعد يتفرج على الهم ده، فمسحته في صمت وخلصنا".

وأكمل العزب منشوره بتعليق ساخر على إحدى كلمات الأغاني قائلًا: "بالمناسبة، أنت حسيت صح... هو في حاجة في 2025 اسمها رماني في شبكه وعيوني ارتبكوا؟ يا راجل؟ مش كده!".

واختتم كلامه: "وآخر نصيحة من صديق فيسبوك قديم: اشتغل أقل بجودة أكبر، عشان هي مش مسابقة على لقب شيخ النحاتين".

قد يهمك أيضــــــــــــــا