سيطرت حالة من الانهيار على الإعلامية ميار الببلاوي، وذلك عقب ظهورها في فيديو لايف عبر حسابها على موقع التواصل الاجتماعي، حيث ظلت تبكي بشدة بسبب اتهام أحد الشيوخ لها بالزنا، وذلك بعد حديثها عن عودتها لزوجها بعد طلاق 11 مرة، خلال حلقتها مع الإعلامية بسمة وهبة في رمضان.

انهيار ميار الببلاوي من البكاء

وقالت ميار الببلاوي: أنا بقالي 30 سنة بتعامل في البرامج الدينية وتركت الفن واتحجبت وأنا في عز شبابي وقولت خلاص من ترك شيئًا لله عوضه الله خيرًا منه.. وانهاردة لما قابلت الشيخ ده في قناة معينة وأنا رايحة مع واحدة صاحبتي روحت سلمت عليه لقيته بيقولي أنا افتكرتك جاية تتخانقي معايا!

وأضافت: أنا مكنتش شوفت كلامه عني ولا كنت بتابع النت لأني تعبانة بقالي فترة.. بس سمعت كلامه عني وبيقول الإسلام بريء مني طب إيه الحرام والغلط اللي أنا عملته عشان يبقى الإسلام بريء مني! لما كنت في البرنامج اتعمل منه مونتاج كتير ولما شوفت قولت خلاص أنا فوضت أمري لله.

وتابعت ميار الببلاوي: الناس بتطلق وبتتجوز 100 مرة والناس فاكرة إنهم هيدوسوا عليا وأسكت بس لأ أنا ست صعيدية ومش هسكت.. أنا معايا ماجستير في الفقه المقارن ومعايا دكتوراه في الخطاب الديني والثقافة الإسلامية.. يعني أنا ست دارسة شريعة ياللي بتقولي الدين بريء منك.

واستكملت: يا جماعة دي حياتي الشخصية ومش من حق حد يعرف أنا اتجوزت كام مرة! وأنا مش هسمح بنص كلمة على شرفي وشرف جوزي وابني وعائلتي كلها.. وأنا عمري ما قولت إني جبت محلل عشان أتجوز.. ومش ميار الببلاوي التي ترجع بشحن رصيد والناس كلها عارفاني كويس وعارفة أنا بنت مين.