يا ترى ايه هي اتفاقية تشجيع وحماية الاستثمارات المتبادلة اللى وقعتها مصر والسعودية فى الساعات الأخيرة؟ وإيه اللي هيحصل في مستقبل الاستثمارات بين البلدين بعد توقيع الاتفاقية الجديدة في حضور الرئيس السيسي والأمير محمد بن سلمان؟ وهل الاتفاقية دي هتفتح باب لفرص استثمارية أكبر للشركات السعودية في السوق المصري؟ وإزاي الخطوة دي ممكن تغير مشهد الاقتصاد في البلدين؟ وهل ده معناه إن في مشاريع ضخمة جديدة جاية في الطريق؟
زي أي استثمار في أي مكان قلا العالم فيه تحديات.. لكن اتفاقية تشجيع وحماية الاستثمارات المتبادلة بتضمن معالجة أي مشكلات قانونية أو بيروقراطية ممكن تواجه المستثمرين فى المستقبل .. يعني مثلًا لو فيه أي خلافات بين المستثمر والدولة الاتفاقية هتوفر آليات قانونية لحلها بشكل سريع وفعال
والاتفاقية اللي وقعها الرئيس عبد الفتاح السيسي والأمير محمد بن سلمان فى زيارة ولى العهد لمصر هي خطوة مهمة جدًا في تعزيز العلاقات الاقتصادية بين القاهرة والرياض.. والاتفاقية دي مش بس هتحافظ على الاستثمارات الحالية لكنها كمان هتفتح الباب لاستثمارات جديدة وأكبر وده مهم جدًا خصوصًا في الفترة اللي العالم كله فيها بيواجه تحديات اقتصادية كبيرة
والاتفاقية بتضمن حماية حقوق المستثمرين في البلدين يعني لو في مستثمر سعودي جاي يستثمر في مصر هيبقى مطمئن إنه حقوقه محمية بالقانون.. والعكس صحيح للمستثمرين المصريين في السعودية.. وده طبعًا بيخلق مناخ استثماري آمن وجاذب للمستثمرين اللي بيكون عندهم أحيانًا تخوفات من العواقب القانونية أو تغيرات السوق.
طب إزاي ده هيأثر على الاستثمارات السعودية في مصر؟
مصر تعتبر سوق استثماري ضخم بالنسبة للسعودية.. والاستثمارات السعودية في مصر على مدار السنين كانت مركزة في قطاعات مهمة زي الطاقة، العقارات، السياحة، والصناعة… ومع توقيع الاتفاقية دي ممكن نشوف زيادة في الاستثمارات في مجالات تانية زي التكنولوجيا والقطاع الزراعي وده مع التوجه العالمي نحو الاستدامة والأمن الغذائي
المستثمرين السعوديين هيكون عندهم فرص أكبر لضخ استثماراتهم في مشاريع البنية التحتية اللي مصر شغالة عليها بقالها فترة فى امكن زي العاصمة الإدارية الجديدة وتطوير الطرق والموانئ. وفي نفس الوقت مصر هتستفيد من ضخ الاستثمارات دي في تنشيط الاقتصاد وتوفير فرص عمل جديدة
وخد بالك اللى هيحصل فى الملف ده هيساهم فى حل أزمة العملة فى مصر لأن فيه مليارات الدولارات هيتم ضخها من المستثمريين السعوديين فى مصر الفترة الجاية
وإيه اللي مخلي السعودية تهتم بالاستثمار في مصر؟
فيه عوامل كتير بتخلي السعودية تركز على الاستثمار في مصر.. أولها إن مصر بوابة لأفريقيا وده بيدي للسعودية فرصة للدخول لأسواق أفريقية جديدة.. كمان مصر بتمتلك قوة عاملة كبيرة وشابة وده بيساعد على نمو الاستثمارات وتوسيع نشاط الشركات السعودية اللي بتدور على عمالة محلية وكوادر متخصصة
تاني حاجة مصر ليها موقع استراتيجي ممتاز وده بيسهل حركة التجارة والاستثمارات بين البلدين ويزود من فرص التوسع في الأسواق المجاورة. كل ده معناه إن السعودية بتشوف مصر كشريك استراتيجي مهم في خططها الاقتصادية
بالإضافة لكده الحكومة المصرية دلوقتي شغالة على تطوير البنية التحتية وتحسين بيئة الاستثمار.. وده معناه إن المستثمر السعودي مش هيواجه نفس التحديات اللي كانت موجودة في الماضي.. وعلى الجانب السعودي في دعم كبير من القيادة السعودية لتعزيز التعاون الاقتصادي مع مصر وده بيضمن استمرارية الاستثمارات على المدى الطويل.
بشكل عام الاتفاقية دي خطوة مهمة لزيادة حجم الاستثمارات بين مصر والسعودية وهيبقى ليها تأثير كبير على مستقبل العلاقات الاقتصادية بين البلدين..ومن المتوقع إن الاستثمارات السعودية هتزيد بشكل كبير في الفترات الجاية، وده هيساهم في تعزيز النمو الاقتصادي في مصر وتوفير فرص عمل جديدة.. ومع الحماية اللي بتوفرها الاتفاقية دي المستقبل الاستثماري بين البلدين هيكون مشرق وآمن أكتر.
والسؤال اللى المفروض يشغل بالنا كلنا دلوقتي هو يا ترى إيه المشاريع الكبيرة اللي هتبدأ تتحقق قريبًا؟ هنستنى ونتابع ونرصد لحضراتكم كل اللى هيحصل وتأثيره على سوق صرف العملات والاستثمار الأجنبي المباشر
إخلاء مسؤولية إن موقع مصر النهاردة يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق