الأحد 05/مايو/2024 - 04:23 ص

المتهم قتل ابني ولبس هدومه، وهو بقاله 20 يوم في المشرحة ونفسي أدفنه.. بهذه الكلمات بدأت والدة المجني عليه والدموع تملأ عينيها والحزن يرسم وجها حديثها للقاهرة 24، قائلة إبني طلع بالتوك توك بتاعه ومرجعش وفي حد قتله وأخد هدوموا لبسها وأخد التوك توك بتاع إبني وقعد يلف بيه في الزاوية الحمراء، ولما سألته فين محمد قالي: أنا بعته يجيب طلب مع أحد الشباب وهو جاي.

تفاصيل مقتل شاب على يد مسجلين خطر لسرقة مركبة توك توك 

والتقى القاهرة 24 بوالدة المجني عليه وقالت: إبني طلع يوم الواقفة قالي أنا رايح أشتغل على التوك توك عشان أجيب أي فلوس أروح أشتري لبس بيها للعيد، قولتلوا روح وبلاش تغيب قالي تمام، وطلع اشتغل شوية وراح اشترى هدوم العيد، وأول يوم قعد مع قرايبه شوية وبعدين رايح يركن التوك توك في جراج الزاوية ونام فيه ومرجعش.

وأضافت والدة المجني عليه: تاني يوم العيد ابني مرجعش البيت روحت سألت عليه أصحابه وقرايبة محدش شافه، روحت جراج الزاوية الحمراء وسألت هناك لقيت راجل أربعيني لابس هدوم إبني وراكب التوك توك سألته محمد فين، قالي رايح يجيب طلب وهيرجع متقلقيش، فـ قولتلوا طب لما يرجع قولوا والدتك جات الجراج وسألت عليك.

وواصلت والدة المجني عليه: رجعت البيت وقلبي مكانش مطمن وحاسه إن في حاجة حصلت، فقعدت أساله عليه في كل مكان وروحت سألت في مراكز الشرطة والمستشفيات بدون نتيجة، فروحت تاني يوم من الساعة 6 الصبح لقيت التوك توك في الجراج بس إبني مش موجود، بدأت أقلق وحسيت إن محمد إبني حصل ليه حاجة والناس دي مش عايزه تقول، وأنا لما بحس بأي حاجة من ناحية محمد ابني بتحصل.

وأشارت والدة المجني عليه: كان في راجل قريبنا ساكن ما بين منطقة الزاوية والشرابية قالي تعالي نروح الجراج تاني ونتكلم مع الراجل اللي إنتِ اتقابلتي معاه، وبالفعل روحنا الجراج وسألنا الراجل محمد فين قال أنا عطيته 200 جنيه يروح يجيب حاجة ومرجعش، فسألناه لو كان اتحبس قول لينا واحنا هنتصرف فقال لا، فالراجل اللي كان معايا قال له إنتم موتوه؟ فهو سمع الكلمة من هنا وسكت شوية وبعدين قالي لا محصلش وكان باين على وشه إنه عمل حاجة وبعدين قال أنا هروح أشوفه عند حد وهرجع علطول وراح مرجعش.

وأردفت والدة المجني عليه: الراجل اللي كان معايا قالي الحل عند الراجل ده، وبعدين روحنا عملنا كذا محضر في كام قسم شرطة، وبعد كده جالي خبر وفاة ابني الوحيد ونزل الخبر عليا كالصاعقة، معرفتش اتمالك أعصابي، لإنه ابني الوحيد ومعنديش غيره وحاولت أبعده عن التوك توك بس كان متمسك، فتحت ليه كذا مشروع لكن هو قالي يا أمي أنا عايز توك توك، مضيفة: واحنا كنا ساكنين في السويس قالي أنا مش مرتاح هنا بعت البيت في السويس وجيت أشتري بيت في حدائق الزيتون، وآخر في المرج.

واختتمت والدة المجني عليه حديثها للقاهرة 24: ابني بقاله 20 يوم في المشرحة نفسي أدفنه بإيدي عشان يرتاح وعايزه حقه، المتهمين خلصوا عليه وبعدين رموه واخدوا هدومه لبسوها، أنا بطالب الجهات المسؤولة إنها تساعدني أدفن ابني وأجيب حقه.

كانت البداية بتلقي غرفة عمليات النجدة إخطارًا مفاده تغيب شاب عشريني عن المنزل بمنطقة الشرابية، وعلى الفور انتقلت الأجهزة الأمنية لمحل البلاغ.

بالانتقال والفحص تبين مقتل الشاب  محمد.ج، 18 عام، مقيم بمنطقة الشرابية، وتم العثور على جثمانه داخل أحد صناديق القمامة، وبسؤال والده أكد اختفاء نجله منذ ثاني أيام عيد الفطر وجرى تحرير محضر بغيابه بعد ان انقطع الاتصال به عقب خروجه بالتوك توك الخاص به لتوصيل عدد من الأشخاص إلى أحد الأماكن.

وتم إخطار النيابة العامة لمناظرة الجثة، ونقلها للمشرحة، وتمكن رجال المباحث من ضبط المتهمين، وتحرر محضر بالواقعة وتولت النيابة العامة التحقيق.