عبر الإعلامي أحمد موسى عن دهشته من تكرار تغيير نظام التعليم في الثانوية العامة، مشيرا إلى أنه لا توجد دولة تقوم بتغيير النظام التعليمي كل عدة سنوات.

وقال موسى، خلال برنامج "على مسؤوليتي" المذاع على قناة "صدى البلد": "حاجة عجيبة فجأة نظام التعليم بيتغير يا جماعة إحنا كل تلات أربع سنين نغير نظام التعليم في مصر، هو في حاجة اسمها كده، هو في حاجة اسمها أنا السنة الجاية بعدل الثانوية العامة وبقى اسمها بكالوريا، آخر مرة سمعناها إمتى دي؟ أيام الطربوش الأحمر؟ بكالوريا؟ ليه هو أنا هطلع لقدام والا برجع".

وأضاف: "لما أقول حاجة زي دي للناس وأقول هنشقلب نظام التعليم ومش هتبقى ثانوية عامة وهتبقى حاجة تانية، والدروس عايز أقولكم في النظام الجديد ده بدل ما كنت بتاخد حصة هتاخد أربع حصص، طبعا محدش لسه عنده تفاصيل، ولكن قعدت أقرا في الورق".

وتابع: "ليه كل حاجة بنجري جه الدكتور طارق شوقي واتعمل نظام تعليم ثم الدكتور رضا حجازي واتعمل نظام تعليم وبعده سيادة الوزير محمد عبد اللطيف وعمل نظام تعليم، ومن أيام دكتور حسين كامل بهاء الدين لغاية النهاردة وقبله والدكتور سرور وغيره نظام التعليم معروف".

وأكمل: "لما أحط نظام تعليم أغيره كل شوية؟ كل شوية نعمل ارتباك في البيت المصري؟ الأسر دلوقتي ثانوية عامة هنعمل أي شهادة؟ طيب المدرس هيدرس بكالوريا والا ثانوية هو أنا جاهز مدارسي كلها النهادرة للبكالوريا".

وأوضح: "بعض الناس قالت النظام ده أحسن من الثانوية العامة، ليه ثانوية عامة والبيوت وأمن قومي ودروس خصوصية والحق الغش ومدارس ولاد الأكابر وطيارات نغير النظام ده ونلغي حاجة اسمها الثانوية العامة ونشتغل بنظام البكالوريا قريبة من النظام الأجنبي الآي جي".

وواصل: "تقديري يعني أنت بتعمل توازن ما بين مدارس الحكومة وما بين المدارس الأجنبي يبقى أنا هنا بعلم في الحكومة نظام قريب من الآي جي، في ناس تتقبل ده وناس متتقبلش ده ومينفعش أقول السنة الجاية هطبق مينفعش كل شوية نظام التعليم نقول السنة الجاية هنعمل".

واختتم: "البعض قال المناهج هتبقى قليلة ودا معناه الأسر مش هتدفع فلوس كتير في الدروس الخصوصية".