كشف اللواء أحمد أبو الفضل، أخر تطورات حريق ستوديو الحي الشعبي داخل مدينة الإنتاج الإعلامي الذي نشب خلال الساعات الماضية. 

رئيس قطاع الأمن بمدينة الإنتاج يكشف تفاصيل السيطرة على حريق الحي الشعبي 

قال اللواء أحمد أبو الفضل، رئيس قطاع الأمن في مدينة الإنتاج الإعلامي، إن الجهات المختصة تمكنت من السيطرة على الحريق الذي شب في الحي الشعبي بالمدينة في وقت سابق اليوم.

وأضاف “أبو الفضل” في تصريحات مٌتلفزة،"تم السيطرة على الحريق، وتم الدفع بـ 20 سيارة إطفاء من وزارة الداخلية من الحماية المدنية، والحمد الله الحريق قارب على التصفية تماما".

وتابع: "الحي الشعبي في مدينة الإنتاج الإعلامي كله خشب على مساحة 2 فدان كلهم اتصفوا تقريبا، ولم تحدث أي إصابات".

وردا على سؤال عن سبب الحريق، قال اللواء أحمد أبو الفضل:"السبب المبدئي ماس كهربي مع الخشب المحمص المبني من فترة طويلة، والأدلة الجنائية ستبدأ التحقيق في الموضوع، والحريق كان محصورا في الحي الشعبي".

وكشفت إلهام شاهين في تصريحات تليفزيونية مع برنامج "ET بالعربي" قائلة: "احنا كويسين مكناش بدأنا تصوير الفيلم لسة، المفروض بكرة كان أول يوم".

وأضافت : "الديكور كان خلص خلاص، والنهاردة كان بتوع الاكسسوار بيفرشوا المكان، لكن احنا كنا هنبدأ بكرة عموما كله شئ نصيب، ومكنش فيه ممثلين النهاردة ولا حد من الفيلم هناك".

نشر المنتج شريف مندور على صفحته الرسمية عبر موقع التواصل الاجتماعي "فيسبوك" وعلق قائلا : "قدر الله ما شاء فعل، بعد أن انتهينا من ديكور فيلمنا الجديد الحب كله إخراج خالد الحجر، قام حريق حالا بالقضاء على الحي الشعبي في مدينة الإنتاج الإعلامي، الحمد لله" . 

جدير بالذكر،تعاقدت إلهام شاهين على بطولة فيلم "الحب كله" من تأليف سيد فؤاد وإخراج خالد الحجر وإنتاج شريف مندور، وتشاركها في بطولته إلهام صفي الدين ابنة شقيقتها بالإضافة إلى عدد كبير من الفنانين، أبرزهم أحمد فتحي وحورية فرغلي.

وفي وقت سابق، حلت الفنانة إلهام شاهين خلال الساعات الماضية ضيفة ببرنامج "ضيفي" مع الإعلامي معتز الدمرداش حيث كشفت إلهام شاهين خلال ظهورها بالحلقة العديد من التفاصيل والأمور المثيرة للجدل في حياتها . 

تحدثت إلهام شاهين عن ظاهرة التبرع بالأعضاء بعد الوفاة قائلة : "نزلت فيديو عن التبرع بالأعضاء بعد الوفاة قلت لما أموت وفي أي شئ سليم، بعض الناس اتريقت وقالت هو فيه دلوقتي شئ سليم، فبدل ما يتريقوا يعملوا خير أو يسكتوا" . 

وأضافت: "لو كل أجهزة الجسم باظت وقرنية العين بس اللي سليمة، ممكن تخلي حد يفتح، دلوقتي بياخدوا كل حاجة حتى الأمعاء والأطراف، فالطب تقدم جدا ممكن ينقل أي شئ من جسم متوفي لجسد حي وتنقذ حياته" . 

وصرحت: “الجمهور اللي أداني القيمة اللي أنا فيها، له حق عليا، والحاجات اللي بقولها دي فيها خير للمجتمع والبشرية زي التبرع بالأعضاء وده مش اختراعي، موجود في كل العالم المتحضر”. 

وتابعت: "البعض بيقول حرام ده جسدك مش ملكك عشان تتبرعي به في شيوخ قالوا حلال مثل الشيخ خالد الجندي، والدكتور سعد الدين الهلالي، احترموا رأي رجال الدين لو مش حابين رأيي" . 

وهاجمت أيضا وسائل التواصل الاجتماعي قائلة : "السوشيال ميديا كلها  هجص  مفيش حاجة اسمها الساحل الشرير ، ومفيش حاجة اسمها اركن العربية بـ 2000 جنية مثل ما يشاع علي مواقع التواصل الاجتماعي" . 

وأوضحت : "اخر الاكاذيب التي ترددت عني في مواقع التواصل الاجتماعي اني اعيش في فيلا والحارس الخاص بها يقول انني انزل ليلًا لاوزع أموال علي الفقراء ، وانا بالاساس أعيش في شقة بمصر الجديدة" . 

كما علقت على تعمدها دائما إثارة الجدل قائلة : "مش بحب أكون مثيرة الجدل ولكني أصبحت مثيرة للجدل، هل أنا بحب ده؟ أنا كده ولكن مش بحب ده" . 

واستكملت : "أنا تلقائية وصادقة وبكره الكذب والنفاق ولا يمكن أن أكون كذابة أو منافقة" . 

وأضافت : "الغلط أقول إنه غلط، والكذابين أحرجهم جدا والمنافقين أعرفهم وأتضايق منهم، فأنا ست صادقة لو بحبك هقول أني بحبك" . 

وتحدثت عن تفاصيل حياتها الشخصية قائلة : "ليه مسموح بالكلام عنها عن الفنان ومش مسموح بالكلام عنها من أي مهنة تانية". 

وتابعت : "أقسم بالله مهري كان 25 قرش والمؤخر 100 جنيه لأن المسألة عندي مش فلوس، و25 قرش ده عشان كان لازم نكتب رقم" . 

وأوضحت : "تزوجت ناس محترمة جدا وعندهم فلوس وأغنياء لكن مطلبتش منهم يحطولي مهر إيه أو مقدم إيه، لأني لما هتجوز راجل هيصرف عليا مش هصرف عليه ولكن مش هو ده الأساس" . 

وصرحت : "أغلب الوقت بشتغل وبصرف على نفسي فأحب حاجات كتير أعملها بنفسي وأنا غير متزوجة حاليا، والناس من حقها تعرف الفنانة متزوجة ولا لا لكن البعض عنده فضول شديد وأنا بكره الناس الفضوليين" . 

وعلقت على أزمة فيلم الملحد قائلة : "الفيلم اتعمله دعاية جامدة جدا، لما بيقولوا فيلم اتوقف أو اتمنع عرضه يمكن ميكونش اتعمل له دعاية كفاية ومش كل الناس مهتمة بيه، ده يخلي الناس كلها عايزة تشوف الفيلم" .

وأضافت : "إيه المشكلة في اسم الفيلم؟ هو مفيش ملحدين في الحياة، ما المانع أن نلقي الضوء عليهم ونقول إن دول غلط" . 

وتابعت : "لما بعمل فيلم عن الإدمان بجيب المدمن وهو بيشم ومبسوط ولكن بجيبه في آخر الفيلم مات، يبقى لما جيبته في الأول خد الشمة ومبسوط هل أنا شجعت الناس؟ لا، المورال إيه في الآخر" . 

وأوضحت : "أنا مش مع منع أي حاجة لا كلام في الدين ولا كلام في السياسة وطول الوقت بنشوف أفلام أمريكية تتحدث عن الإلحاد والجنس والأديان والسياسات ورؤساء أمريكا وكواليس السياسة" .