في حالة غضب  من المواطنين علي الحكومة بسبب قرار رفع اسعار اسطوانات الغاز واللي وصلت لـ50% للاسطوانات للقطاع التجاري والمنزلي..  طيب دلوقتي الحكومة شالت مل الدعم عن الغاز ولا لسه فيه زيادة تاني.. واية مصير توصيل الغاز الطبيعي للمنازل  سعره هيوصل كام دلوقتي

قرار الحكومة برفع اسعار اسطوانات البوتاجاز كان صادم للمصريين خصوصا أن في عدد كبير من الاسر اعتمادها بشكل كامل بيكون علي انبوبة الغاز ولسه في بيوت كتير خدمة الغاز الطبيعي له موصلتش ليهم، وطبعا الزيادة الجديدة هتزود اعباء مالية جديدة علي الاسر المصرية.

طيب هل الحكومة لسه بتدعم انبوبة الغاز بعد الزيارة الاخيرة وللي حصلت في اسعار انبوبة الغاز؟.
الدكتور مصطفي مدبولي عمل مؤتمر صحفي علشان يوضح للناس اسباب زيادة الاسعار وتطبيق الزيادة الجديدة علي انبوبة البوتجاز وقال أن مصر بتستهلك 280 مليون أسطوانة بوتاجاز سنوياً، وتكلفة الاسطوانة الواحدة علي الدولة بتوصل لـ 340 جنيها، وكانت بتتباع بسعر 100 جنيه يعني الدعم الحكومة في الاسطوانة الواحدة بيوصل لـ 240 جنيها، وبيوصل أجمالي الدعم اللي بتخصصه الدولة لأنبوبة الغاز لـ60 مليار جنيه سنوياً، وده طبعا بخلاف دعم المواد البترولية التانية والزيادة الجديدة كانت هيا محاولة من الدولة لتقليل حجم الخسائر والدعم اللى بتتحمله وفي الوقت الحالي لازم المواطن يشيل جزء بسيط من الاعباء المالية اللي بتتحملها الدولة من فترات طويلة .

طيب ليه الدولة أخذت القرار في التوقيت ده بالذات؟.
الحقيقة في اكتر من سبب خلي الدولة تاخذ قرار زيادة اسعار اسطوانات الغاز في الوقت الحالي واحد من اهم الاسباب دي وهو التغيرات الجيوسياسية اللي بتحصل في اغلب دول العالم واللي طبعا لها تاثير مباشر علي اسعار الطاقة في الدرجة الأولي وحاليا اسعار الطاقة تضاعف وبشكل كبير، وبالتالي الدعم اللي بتدفعه الدولة المصرية لدعم الطاقة تضاعف هو كمان ووصل لرقم صعب علي الدولة أنها تتحمله، وكان لازم الدولة تحمل جزء بسيط منه علي المواطن علشان الدولة تقدر كمل المتطلبات الموجودة منها وتقدر تكمل مسيرتها للاخر.

طيب ايه مصير الغاز الطبيعي وسعره هيوصل هو كمان لكام ؟.
جزء كبير من اتجاه الدولة لتوصيل الغاز الطبيعي للمنازل هو تخفيف الدعم الحكومي لاسطوانات الغاز خصوصا أنه بعد الارقام اللي اتكلم عليها رئيس مجلس الوزراء فكده الدولة بتتحمل فاتورة تقيلة جدا، وعلشان كده الدولة خصصت 3 مليارات و500 مليون جنيه لبرامج توصيل الغاز للمنازل بالموازنة الجديدة ، وفي الوقت الحالي ملف توصيل الغاز الطبيعي للمنازل اصبح في مقدمة الملفات اللي تم إدراجها بالموازنة الجديدة، ومشروع الموازنة العامة للدولة للسنة المالية 2024/2025 بيستهدف الانتهاء من توصيل الغاز الطبيعي للأسر المستهدفة وده كله بهدف تخفيض دعم المواد البترولية الموجه لأنبوبة البوتاجاز.