إيه هي المكاسب اللي هتعود على الاقتصاد المصري من الافتتاحات الجديدة لوزارة النقل، واللي بتقدر ب 20 افتتاح جديد  امبارح بحضور الرئيس السيسي، وامتى المشروعات دي هتضخ فلوس في نبض الاقتصاد، وإيه علاقتها بالتنمية المستدامة.. هنقولك كل التفاصيل في الفيديو ده.

امبارح، الرئيس عبد الفتاح السيسي رئيس الجمهورية، افتتح محطة قطارات صعيد مصر بمنطقة بشتيل بالجيزة، و19 مشروع جديد بوزارة النقل في مجالات مترو الأنفاق والطرق ومحاور النيل والكباري أعلى المزلقانات والكباري العلوية .

وتحديدا، الافتتاحات دي، هي محطة بشتيل، وخط سكة حديد الفردان/ بئر العب، وخط سكك حديد كفر داود/ السادات، وتطوير نظم الاشارات على خط سكة حديد بني سويف - اسيوط، وكمان المرحلة الثالثة من الخط الثالث لمترو الأنفاق.

وشملت الافتتاحات كمان، محور بديل خزان اسوان، ومحور الزقازيق السنبلاوين، وتطوير وازدواج طريق 6 اكتوبر / الواحات، وتطوير وازدواج طريق اسيوط / قنا / الاقصر الصحراوي الشرقي، وتطوير وازدواج طريق دهب / نويبع.

ضيف على قايمة الافتتاحات،  وازدواج طريق الفردان / الصالحية، و6 كباري اعلي المزلقانات، و3 كباري  بطريق القاهرة الاسكندرية الزراعي.

طب إيه هي الجدوى الاقتصادية للمشروعات دي؟

بص يا سيدي، محطة بشتيل لوحدها مفترض تضيف ربع مليون راكب يوميا لشبكة السكة الحديد، وده بالتالي هيزود في إيرادات الهيئة وبالتالي هيعود على خزينة الدولة بالايجاب، يعني السكة الحديد هتقدر تصرف على التشغيل والصيانة بجانب توفير نفقات إضافية هتضخها في خزينة الدولة، وهي بتقدر بحوالي 2 مليون جنيه كل يوم.

أما المرحلة التالتة للخط الثالث للمترو، فمفترض تضيف 350 ألف راكب لشبكة المترو كل يوم، المكاسب هنا بتقدر ب 3 مليون جنيه، وبالتالي ده مبلغ كافي لانعاش خزينة المترو ووزارة النقل وهيعود بالخير الاقتصاد ككل.

كل ده بجانب خطوط السكة الحديد الجديدة اللي هتساهم في تعزيز حركة نقل البضائع والمساهمة في انتعاش حركة التجارة، ده غير الطرق والكباري الجديدة اللي هتسهل على المواطنين الذهاب لعملهم وبالتالي زيادة القدرة والطاقة الإنتاجية.

أما المكاسب الاقتصادية لإنشاء خطوط السكك الحديدية الجديدة، فهي بتتخلص في انها هتربط الموانئ الجافة والمناطق اللوجيستية مع خطوط السكك الحديدية الحالية، وده هيساهم في زيادة حركة نقل البضايع وتعزيز حركة التجارة الداخلية، والتخديم كمان على الموانئ وبالتالي هتنعكس بالايجاب على الاقتصاد المصري.

نقدر نقول كمان، إن السكة الحديد بتنقل حاليا ما يعادل 5.5 مليون طن من البضائع سنويا، وده بيجي بفضل جهود تحديث الشبكة وإضافة قطارات جديدة، كمان ممكن جدا الرقم ده يتضاعف في حالة لو نجحت الدولة في إضافة المزيد من قطارات الشحن إلى أسطولها الحالي، لأن ده هسيساعد الحكومة على تحقيق هدفها المتمثل في نقل 30 مليون طن من البضائع سنويا بحلول عام 2030.

كمان، القطارات سهل جدا تنقل كميات أكبر مقارنة بالشاحنات، ود بيخليها خيار أكثر فعالية من حيث التكلفة لنقل كميات كبيرة من السلع لمسافات بعيدة، وهي كمان أقل في استهلاك الوقود بأربع مرات من الشاحنات.

يعني القطارات ممكن تقطع مسافات طويلة بأقل صيانة ممكنة مقارنة بالشاحنات، وكمان ممكن يتم الاعتماد عليها في تقليل استخدام الطرق، وده هيقلل بالتبعية من التآكل الناتج عن الشاحنات الثقيلة، عشان كده لازم يتم زيادة الاعتماد على القطارات كأفضل وسيلة في التنقل ونقل البضائع بسبب أهميتها الاقتصادية الكبيرة.