هو احنا امته نشوف الحكومة بتعلن خبر سداد ديون مصر بالكامل، وانتهاء الأزمة الاقتصادية بشكل نهائي، وامته المواطن المصري يعيش حياة أوروبية مرفهة، بعد سنين كتيرة وطويلة من الأزمات الاقتصادية الطاحنة.. هنقولك كل التفاصيل في الفيديو ده. 
 

البروفيسور جيفري ساكس، هو واحد من أهم الاقتصاديين العالميين، واتكلم عن مصر، في منتدى اقتصادي تم انعقاده تحت رعاية الدكتور مصطفى مدبولي، رئيس مجلس الوزراء.

"ساكس" واللي بيعتبر شخصية عالمية كل الناس بتسمع آرائه، قال إن قارة إفريقيا من القارات الواعدة اقتصاديا، وفي حالة انها استمرت في التعليم هتكون لاعب اقتصادي مهم ومحترم، لأن هيكون فيها ربع سكان العالم، ودي فرصة كويسة جدا لتحقيق انتعاش اقتصادي.

واتكلم كمان عن الاقتصاد المصري، وقال السوق المصري سوق واعد بالنسبة للمستثمرين، وفي مجالات كتير  بتعتبر فرص وممكن استخدامها على المستوى البعيد، زي تكنولوجيا المعلومات والسياحة، وتسويق القدرات العقلية وغيرها.

وأكد كمان إن مسألة الدين الخارجي يمكن التعامل معها وحلها خلال 30 عاما، في حالة جدولتها على فترة زمنية أطول، ووقتها هيكون بإمكان مصر أنها تقلل حجم الدين، ودي فرصة كويسة جدا.

وذكر كمان، إن هيكون فيه فرص كويسة جدا للتعامل مع الديون في حال وضع خطة ممنهجة، بجانب استغلال المصادر التانية للاستثمار والتعامل مع الأسواق المفتوحة زي الصين،.

وقال كمان إن فرص مصر كبيرة جدا في حل الأزمة الاقتصادية وجدولة الديون، ونصح باستغلال الفرص الواعدة في قارة إفريقيا كأحد الأسواق الكبيرة للاستثمار فيها، وكمان السوق الهندي لانه سوق كبير جدا وضخم.

وبخصوص انضمام مصر لتكتل البريكس، قال إن الصين والهند وروسيا وإفريقيا والبرازيل أسواق وشركاء مهمين جدا، وعندهم فرص للتمويل في الدول دي، عشان كده فالفرصة الاقتصادية مهمة ومهم جدا استغلالها خلال ال 20 سنة الجاية عشان تحصل نقلة كويسة ومحترم للاقتصاد المصري عشان تنتهي أزماته بالكامل ونقدر نحقق انتعاشة دائمة ومستمرة له.