لو معاك فلوس وعايز تستثمرها في البورصة، تبدأ منين وإزاي تحقق أرباح في أقل فترة ممكنة، وإيه الأسهم اللي ممكن تحط فيها فلوسك وأنت مطمن.. هنقولك كل التفاصيل في الفيديو ده فتابعنا للآخر.
البورصة طبعا من أفضل وسائل الاستثمار، وفي شركات كتير بتلجأ للاستثمار فيها من خلال طرح نسبة من أسهمها في البورصة، وبالتالي بيكون قدام المساهمين والمستثمرين الأفراد، فرصة للمشاركة في الطروحات دي، وشراء أسهم عشان يحققوا أرباح مالية.
عشان كده خبراء كتير بيقولوا، إن الاستثمار في البورصة بيعتبر أفضل أدوات الاستثمار في الوقت الحالي، لأنها أداة من أدوات التحوط من ارتفاع معدلات التضخم خاصة في ظل اللي بيشهده الاقتصاد العالمي من تحديات، وكمان مع استمرار انخفاض القيمة السوقية لأغلب الأسهم المدرجة بالبورصة المصرية.
ولو حضرتك فعليا عايز تستثمر في البورصة، فلازم تختار التوقيت المناسب وتدرس السوق كويس، وده لأن تحقيق أرباح من الاستثمار في البورصة، بيعتمد على اختيار التوقيت المناسب ودراسة السوق بشكل جيد، عشان تحدد أفضل الشركات والقطاعات اللي بيكون بها فرص قوية لتحقيق أرباح.
وضروري جدا إن يكون في تنويع في المحفظة الاستثمارية، من خلال شراء أسهم من قطاعات مختلفة، بس حاول تركز مع أسهم الشركات اللي بتكسب على طول، أو اللي لها تاريخ كويس لأنها بالتأكيد لو خسرت شوية فهترجع تاني لمجدها، وراقب السوق كويس قبل ما تحط فلوسك في الأسهم، وياريت يبقي عندك رؤية مستقبلية عن احتياجات السوق والأسهم اللي هيكون عليها الطلب المرتبط بالاحتياجات دي قريب.
كمان في فرص قوية في البورصة المصرية، عشان حضرتك تقدر تحقق أرباح عالية، فرغم انخفاض القيم السوقية لأغلب الأسهم المدرجة، في شركات نجحت في تحقيق معدلات نمو مرتفعة خلال العام المالي الماضي، وده انعكس بالايجاب على مؤشراتها في البورصة وبالتالي بيزود من ثقة المستثمر في الأسهم بتاعتها.
كمان، الشركات المدرجة بالبورصة المصرية، حققت أداء إيجابي جدا في الفترة الأخيرة، وده تسبب في تحقيق معدلات أرباح مرتفعة على الأموال المستثمرة بمختلف القطاعات واللي تخطت 100%.
ولكل حد عايز يحط فلوسه في البورصة، فلازم يكون حريص على أن الفلوس دي محل الاستثمار، فلازم تكون من الفوائض المالية، كمان لازم يتم اختيار أفضل القطاعات المرتبطة بالاقتصاد، وبعد ذده يتابع الأخبار الاقتصادية بشكل يومي، لأن ممكن جدا يكون لها تأثير على تحركات الأسهم، لأن المستثمر لازم يقتنص الفرص ويجني أرباح كويسة من الأسهم.
ومهم كمان، إن المستثمر يعمل حساب المخاطر والأرباح المتوقع الحصول عليها، وتكلفة الاستثمار وتكلفة الفرص البديلة ويقارن ده بالأوعية الادخارية التانية، عشان يضمن أن فلوسه هتكسب وتعمل أرباح حلوة، وبكده يكون حقق اللي نفسه فيه، وفلوس تجيب فلوس وتبدأ رحلة تحقيق الملايين من البورصة.
إخلاء مسؤولية إن موقع مصر النهاردة يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق