من ساعات البنك المركزي أعلن تحقيق ميزان المدفوعات فائض كلي بحوالي 9.7 مليار دولار خلال العام المالي 2024/2023 مقارنة بـ882.4 مليون دولار فقط فى نفس الفترة السنة اللى فاتت..فيا ترى الكلام ده معناه إيه ؟ وإيه تأثيره على أزمة نقص العملات الأجنبية؟ ويعنى ايه أصلا ميزان مدفوعات . وإيه أهميته لمصاريف الدولة ؟

حسب بيان حديث من البنك المركزي حقق ميزان المدفوعات المصري فائض كلي بنحو 9.7 مليار دولار خلال العام المالي 2024/2023.. ووفقا للبيان نفسه النمو القوي لميزان المدفوعات مدعوم بشكل أساسي من "الزيادة التاريخية" لصافي الاستثمار الأجنبي المباشر واللي سجل حوالى 46.1 مليار دولار في العام المالي الماضي، مقارنة بنحو 10 مليارات دولار في العام المالي السابق عليه، مدفوعا بشكل أساسي بصفقة رأس الحكمة.. كمان ارتفعت تدفقات الاستثمارات الأجنبية المباشرة الواردة للقطاع البترولي إلى 5.7 مليار دولار، مقارنة بـ5.6 مليار دولار في نفس الفترة.

طب الكلام ده معناه إيه ؟

بص يا سيدي مصر عملت حاجة كبيرة أوي، حاجة ممكن تكون غيرت قواعد اللعبة الاقتصادية بتاعتنا. تخيلوا إننا بقينا عندنا فلوس زيادة بدل ما نكون عايزين فلوس!

بس إيه يعني ميزان مدفوعات وفائض؟

ببساطة كده، ميزان المدفوعات ده زي ميزانية البيت بالظبط.. بس بدل ما نتكلم عن مصاريف البيت بنتكلم عن مصاريف الدولة كلها يعني كل الفلوس اللي داخلة مصر من صادرات وسياحة واستثمارات، مقابل كل الفلوس اللي طالعة من مصر عشان نشتري حاجات من بره.

طب الفائض ده إيه اللي جابه؟

الفائض ده نتيجة لعدة حاجات أهمها إن الاستثمارات الأجنبية في مصر زادت بشكل كبير أوي خصوصاً بعد صفقة رأس الحكمة الكبيرة .. يعني فيه شركات كتير من بره قررت تستثمر فلوسها في مصر، وده طبعاً بيجيب معاه عملات صعبة كتير أوي وبيزود المعروض النقدي من الدولار

طب إيه علاقة الفائض ده بأزمة الدولار؟

العلاقة دي قوية أوي.. أزمة الدولار اللي كنا بنعاني منها الفترة اللي فاتت كانت بسبب إننا مش لاقيين الدولار كفاية عشان نغطي كل احتياجاتنا من الاستيراد لكن دلوقتي مع الفائض ده، الوضع اختلف تماماً. الدولار بقى متوفر أكتر، والجنيه المصري بقى أقوى وبالتالى سعر العملة الأمريكية متوقع ينخفض بشكل ملحوظ الفترة الجاية

وده ممكن ينعكس على حياتنا إزاي؟

الكلام ده هينعكس على حياة المصريين بشكل إيجابي كبير.. يعني إن الأسعار هتستقروالسلع هتبقى متوفرة، والناس هتقدر تشتري كل اللي هي عايزاه.. يعني هتلاقي الدولار متوفر في البنوك ومش هتضطر تدور عليه في السوق السوداء. .. يعني هتلاقي كل أنواع العملة متاحة وهتقدر تسافر براحتك من غير ما تقلق على الدولار.

بس في حاجة لازم نعرفها، الفائض ده مش معناه إننا بقينا أغنى بلد في العالم. لا طبعاً، بس هو خطوة كبيرة في الاتجاه الصحيح. خطوة بتبين إن الاقتصاد المصري بيعود لوضعه الطبيعي، وإننا قادرين على تجاوز التحديات اللي واجهتنا في الفترة اللي فاتت.

يعني مستقبل الاقتصاد المصري بيبدو واعد جدا.. بس لازم نفضل مستمرين في العمل والاجتهاد عشان نحافظ على المكاسب اللي حققناها، ونحقق المزيد من النمو والازدهار لمصرنا الحبيبة.