يا ترى لو أنت معاك فلوس وعايز تدخرها أو تستثمرها، تحطها في إيه، دهب ولا عقارات، طب لو أنت خايف من تقلبات الدهب وإنه ينزل فجأة أو تشتري عقار ويخسر تعمل إيه.. هنقولك كل التفاصيل في الفيديو ده فتابعنا للآخر. 
 

طبعا كتير من الناس بيحتاروا يحطوا تحويشة العمر فين، فمنهم اللي بيلجأ للدهب لأنه الملاذ الآمن للادخار أو الاستثمار زي ما بيقول خبراء الاقتصاد، ولكن في ظل تقلبات أسعار الدهب وانخفاضه في الأيام الاخيرة، ناس كتير بتخاف تجازف، عشان كده بتدور على طرق تانية.

وأول حاجة بيعملوها، هي دراسة السوق بشكل جيد عشان يعرفوا حجم المخاطر في نوع الاستثمار اللي هيختاروه كوعاء مالي لهم، لأن في حالة اختيار الدهب للاستثمار فالأفضل أن يكون الاستثمار طويل الأمد تجنبًا للتقلبات السعرية السريعة اللي بتحصل في الأسواق، يعني لو حضرتك عايز تحط فلوسك فق الدهب فلازم يبقي بالك طويل لمدة من 3 إلى 5 سنين عشان تحقق هامش ربح محترم.

ومن هنا، لازم تفرق ما بين أن يكون اختيار الدهب كطريقة آمنة لحفظ الأموال بحيث يمكن تسييله أو تحويله لسيولة مالية في الحال، أو يكون الهدف الأسمى هو حفظ قيمة الفلوس عشان ماتضعش تحويشة العمر في ظل زيادة التضخم، كمان لازم تركز إن الاستثمار مهم جدا يكون بعيد المدى في الدهب، ودي طريقة سهلة وآمنة عشان تحقق مكاسب كبيرة خاصة لأي حد معاه فوق 300 ألف جنيه.

أما لو حضرتك اخترت العقارات كنوع للاستثمار، فلازم تعرف كويس المعلومات المهمة والمخاطر بخصوص الاستثمار فيها، وهي أن العقار بيحتاج لرأس مال كبير، يعني على النقيض من الدهب اللي ممكن تستثمر فيه بأي مبالغ.

كمان من أهم التحديات اللي بتواجه الاستثمار في العقار، إنك لو بتفكر تبيعه هتحتاج لوقت طويل عشان تلاقي المشتري المناسب، فبيحتاج لوقت طويل عشان المستثمر يقدر يحقق  مكاسب كويسة، فمن الأفضل إن تكون المبالغ لا تقل عن مليون جنيه عشان يكون الربح مقبول.

بس في نفس الوقت هنقولك توقعات أسعار الذهب في نهاية السنة دي 2024 وبداية 2025

بص يا سيدي، دلوقتي أسعار الدهب تخطت كل التوقعات، ولكن متوقع إن سعر الأوقية يتراوح ما بين 2700 و3000 دولار للأوقية خلال الربع الأخير من السنة دي، يعني الثلاثة أشهر الأخيرة من 2024، عشان يسجل سعر الذهب عالميا مستوى تاريخي جديد وغير مسبوق، ولكن الكلام ده مجرد تكنهات بس بتستند للارتفاعات القياسية الأخيرة وتوترات المنطقة وتصاعد حدتها، خاصة وأن الدول المصدرة للنفط ترتكز غالبيتها في منطقة الشرق الأوسط.

ونقدر نقول إن سعر الدهب العالمي بيتقيم بالدولار الأمريكي، وده لأن العملة الخضرا هي الوحيدة اللي مازالت مرتبطة الدهب، والسبب هو اتفاقية بريتون وودز، عشان كده سجل سعر أوقية الذهب عالمية وفقا لآخر تحديث حوالي 2661 دولارا، زي ما أعلنت البورصات العالمية للمعدن الأصفر.

طب إيه هي مزايا الاستثمار في الدهب؟

بنوك الاستثمار العالمية بتوصي دايما بشراء الدههب والاستثمار فيه وده لعدة أسباب؛ أولها إنه مربح على المدى الطويل، وملاذ آمن للمستثمرين، وأداة تحوط من التقلبات والمخاطر، وكمان وسيلة لعدم تآكل المدخرات بمرور الزمن.

ومع توجه البنك الفيدرالي الأمريكي لخفض الفائدة على الدولار وتوقعات الدهب بمواصلته تحقيق مزيد من الصعود عالميا، أوصى خبراء الاقتصاد بشراء الدهب كأداة استثمار وتحوط بدلا من الدولار اللي بيتجه دلوقتي للتراجع وسط ضغوط التضخم اللي بيعاني منها اقتصادات دول العالم.

أما بالسنة لتوقعات أسعار العقارات في سنة 2025، فوفقا للخبراء في الملف ده، فالأسعار رايحة على ثبات، لأن دلوقتي السوق العقاري بيشهد حالة من الاستقرار وده انعكس بالإيجاب على الأسعار، خاصة إن مافيش أي تأثير لخفض سعر الفائدة الأمريكية على العقارات في مصر.

وممكن يحصل انخفاض لأسعار العقارات، ونقدر نقول لحضرتك إنك لو ناوي تشتري شقة بغرض السكن، فانزل دلوقتي وشوف طريقة الشراء اللي تناسبك سواء كاش أو تقسيط، وده لأن كل المؤشرات بتقول إن أسعار العقارات خلال الفترة الجاية لحد بداية سنة 2025، هتشهد حالة من الاستقرار، وده بالتزامن مع الارتفاعات الكبيرة اللي شهدتها أسعار العقارات خلال الفترة الماضية، خاصة من سبتمبر 2023 وحتى نهاية فبراير 2024.