كل الناس كانت مستنية اعلان الدولة لفتح باب العمرة باي طريقة، ولما الدولة فتحت حصلت أزمة هتهدد استمرار الموسم بشكل كامل.. وممكن تؤدي لوقف تفويج الرحلات بشكل كامل..  ايه هيا الأزمة دي وإزاي هتأثر علي موسم العمرة.. تعالوا نشوف إيه الحكاية

الحج والعمرة واحدة من الحاجات اللي كل الشعب بيستناها من سنة للتانية، وكل الناس نفسهم يروحوا يعملوا مناسك الحج والعمرة كل سنة، بس ارتفاع أسعار برامج الحج والعمرة هو السبب الرئيسي اللي بتأخر أغلب الناس علي عمل المناسك بسبب الظروف الاقتصادية اللي كلنا عايشين فيها دولوقتي،؟ خصوصا أن اقل برنامج عمرة دلوقتي سعره معدي 35 الف جنية، وسعر برنامج الحج داخل علي ربع مليون جنية .
طيب اية اللي حصل في موسم العمرة واية الازمة اللي بتهدد الموسم؟.

في شهر سبتمبر اللي فات وزير السياحة والآثار شريف فتحي اعتمد ضوابط العمرة، والضوابط دي اقرت بدء تفويج الرحلات مع انتهاء توثيق الشركات اللي عايزة تشتغل في الموسم، وفعلا الشركات بدأت توثيق عقود عملها بعد ما جهزت خطابات الضمان واللي وصلت قيمته لـ5 مليون جنيه منهم 1.5 مليون جنية الشركات دفعتهم كاش، و3.5 مليون جينة قدمتهم الشركات بموجب شيك بنكي مستحق الدفع، وخطاب الضمان ده عبارة عن فلوس الشركات بتحطها في حساب غرفة شركات السياحة علشان لو في معتمرين اتاخروا أو حصل لهم مشاكل وحبو يقدموا شكوي في شركة السياحة اللي كانوا طالعين معاها يخصموا منها فلوس مقابل التقصير اللي حصل في الخدمات للمعتمر .

لحد كده حلو قوي، ويا دوب الموسم اشتغل والناس بدأت تحجز برامج العمرة، وشركات الطيران اعلنت عن تطبيق زيادات جديدة في اسعار تذاكر العمرة علي الاسعار اللي كانت اعلنت عنها قبل كده، ووصلت الزيادة الجديدة لـ3500 جنيه، ووصل حاليا سعر تذكرة طيران العمرة من 11 الف جنيه لـ14.5 الف جنية، وده سعر اقل تذكرة طيران في موسم العمرة حاليا، وطبعا السعر ده بيختلف لو المعتمر عايز يغير خط سيرة سواء السفر من القاهرة والعودة من جده او المدينة المنورة.

الغريب في الزيادة الجديدة دي هو إن سعر صرف العملات الأجنبية في البنوك مقابل الجنية المصري مستمر، ومحصلش اي زيادة في الاسعار، ومحدش عارف سبب الازمة دي اية، وبسبب الزيادة دي في ناس كتير جدا أجلو سفرهم لعمل مناسك العمرة خصوصا انهم فوجئوا بزيادة الأسعار اللي كانوا متفقين عليها مع الشركات، وفعلا في شركات أجلت تفويج رحلات العمرة في شهر أكتوبر الحالي لشهر نوفمبر اللي جاي لحد ما يكونوا عرفوا الاسعار بشكل كامل وكمان يعيدوا تقييم أسعار برامج العمرة اللي اعلنوا عنها قبل كده ويحطوا السعر الجديد للبرامج، علشان متحصلش مشكلة تاني للشركات مع المعتمرين خصوصا أن الشركات بتحب يكون لها سمعة كويسة في سوق العمرة لأن السمعة دي هيا اللي بتجيب المعتمر علشان يحجز برنامج العمرة من الشركات .