حرصت الفنانة ميران عبد الوارث على إحياء ذكرى وفاة والدها الفنان الراحل أحمد عبد الوارث، وذلك من خلال حسابها الشخصي بموقع الصور الشهير إنستجرام.

وكتبت ميران عبد الوارث معلقة: "زى الليلة دى من 6 سنين، مكانش جايلى نوم برضه، عشان مكنتش عارفة هاصحى أشوفه تانى ولا هتبقى كانت آخر مرة خلاص، كان مجرد إحساس، من قوته افتكرته تهيؤات، أو مخاوف، سبحان الله بقالى 6 شهور أو أكتر، مناعتي زى الفل، ضِعفت امبارح، وعييت، كأن مهما بتمر السنين، الجسم مسجل أنه فى اليوم ده هيتعب، فكل سنة، فى نفس اليوم ده، بعيشها من أول وجديد".

وتابعت: "زي الليلة من 6 سنين، فقدت عمود من عواميد تعريفى لنفسي، نصي التانى والأهم، فهمت يعنى إيه تعب ويعنى وجع ويعنى إيه هم، بس فى نفس الوقت زي الليلة دى من 6 سنين، هو راح وجيت أنا، كسر كبير، بس زي ما بيقولوا دخل نور أكبر، لأن مهما كان الوجع، فاللهُ أكبر، أكبر من كل شىء، وهو صاحب كل شىء، وطالما ده اللى قدره، يبقى أنا تمام".

وأضافت: "وفعلاً زى الليلة دى من 6 سنين، حصل أكتر حاجة كنت بخاف منها، وبسببها، تحررت، وعقلى هدى وقلبى ارتاح، عشان اللى كنت طول عمرى ماسكة فيه راح، ففهمت، إنه مش عايزنى أمسك فى حد غيره سبحانه".

واستكملت: "مات الوالد واتولد طفل جديد زي الليلة دى من 6 سنين، فقدت أبويا وعرفت أنا مين، ومن عرفَ نفسه، عرف ربه، اللهم لك الحمد على نعمة الوعي، رحم الله كل أحبابنا المسلمين، أرجو الدعاء لوالدي بالرحمة والمغفرة".